E fecha exacto cu Rosario College a ser funda no ta conoci. Nos no a logra haña ningun documento cu tin di haber cu Rosario College. Como cu Rosario College ta keda den e mesun edificio di Maria College, nos a busca informacion cu tin di haber cu Maria College. For di corespondencia y documentonan haña di Archivo Nacional Arubano, nos a constata cu e prome carta di Gobernador di Corsou caminda departamento di Obranan Publico (DOW) ta declara cu a tene un destaho publico pa e construccion di Santa Maria College ta fecha 6 april 1945. For di Maria College nos a haña copia di un schrift cu nomber di e alumnonan cu a gradua pa MULO na aña 1944.
For di e informacionan ricibi nos ta calcula cu Rosario College a ser construi durante añanan 1944-1945.
Segun un recorte di corant cu ex-cabesante juf Stella Tromp-Chan a ricibi di pader Jacques v/der Lee, den luna di februari 1950 Maria College a keda inaugura y bendiciona oficialmente. E informacion ta sigi bisa cu apesar cu e scol ya tabata den uso varios aña caba, ainda nan tabata wardando riba electricidad.
Arkitecto Bakker a percura pa e diseño y Petrona & Croes a ehecuta e trabou.
Pastoor Bartel a bendiciona e scol y un koor bou direccion di frèrenan a percura pa e canticanan. Un alumno a expresa palabra di gratitud na e cuerpo di maestro cu ta labora na Maria College y cu ta haci di nan miembronan activo y bon forma di Iglesia y comunidad. Pastoor Bartel despues di a gradici tur presente a mustra riba e tarea di scol den formacion di caracter y sabiduria y a pidi Señor pa e maestronan por ta colma cu obediencia, humildad y temor pa Señor y pa e alumnonan por ta colma cu animo pa studia.
Señor Goslinga, inspector di enseñansa e tempo ey, a remarca cu e ta contento cu gobierno a comprende su obligacion di cumpli cu deseo di mayornan pa nan yiu por ta na un scol di denominacion catolico.
Tambe sr. Goslinga a gradici Zusternan Dominicanesse pa nan trabou incansabel pa enseñansa na Aruba. Mas o menos 700 alumno femenino tabata presente na e ceremonia aki.
For di Zr. Juliette o.p (ordo di predicador) y Zr. Lucy o.p nos a haya e siguiente informacion.
Dia 25 di juli 1963 Maria College ta keda parti den 3 scol.
- Maria College: MULO-“bovenbouw” cu 11 klas y e cabesante tabata Zr. Dorothea o.p.
- Rosario College: MULO-“onderbouw” cu 8 klas y e cabesante tabata Zr. Marie Christine o.p. kende ta na bida ainda y ta biba den e convento di Soeurnan Dominicanessen di Voorschoten, Hulanda. Pues e aña aki Rosario College lo celebra su 61 aña di existencia.
- Judansa di Cristian College: MULO “onderbouw” 11 klas y e cabesante ta Zr. Angèle o.p.